Conciencia e consciencia de xénero na linguaxe, ou como arreporse contra a deslexitimación da linguaxe non sexista

Este capítulo propón un debate no que examinar as acusacións máis frecuentes contra a inclusividade lingüística de xénero, para posteriormente poder desenmascaralas cos argumentos que nos fornece a lingüística crítica, na súa rama da lingüística feminista. A variedade e cantidade destas acusacións deslexitimadoras en contra da linguaxe non sexista inclúe aquelas falacias contra o que verdadeiramente significa e persegue a linguaxe inclusiva, as máis das veces acompañadas de proclamas xustificadoras da linguaxe androcéntrica á que se considera correcta. O meu obxectivo é, xa que logo, ofrecer un decálogo de contraargumentacións coas que rebater falacias sumamente estendidas sobre a importancia social da linguaxe, a corrección gramatical, a con(s)ciencia de xénero en mulleres e homes, o papel do xénero gramatical no sexismo lingüístico, o masculino xenérico, a feminización dos nomes de profesións, a economía da linguaxe e, finalmente, o debate sobre o politicamente correcto.